يوميات سائق تكسي
الشهر اي ولى تأخر الراتب فاضطريت اشتغل تكسي بسيارتي رغم ايماني انها مهنة مذلة لصاحبها ومهينة له فسائق التكسي يعيش حالة مطاردة للعبرية وهؤلاء اي العبريه بيهم الخوش انسان وبيهم التافه جداً وخلال خمس أيام او ستة صادفت الكثير من النمونتين .
بالسيارة واني اسوق ما اكدر افتح موضوع وي واحد وهاي من طباعي اولاً ولكي اغير صورة صاحب التكسي الذي يهذي كثيراً كما هو معروف عن الكثير منهم ثانياً كما الحلاقون . اسوق بهدوء الى درجة ان احدهم قال لي ساعة السودة الي اجرتك بيهه شنو قابل تمشي على بيض !
رغم اني لستُ متديناً الا انني اتوجه الى الله قبل وصولي الى الشارع العام خارجاً من دربونتي الضيقة بعد ان اعدد كل الاسماء التي اعرفها وتخص عترة محمد وال محمد متوسلاً بهم تسهيلاً للرزق ؟
اخذ وياي بطل مي حتى ما اضطر اوكف واشتري من الشارع ضغطاً للميزانية وتقليلاً للهدر . جانت سيارتي قبل لا اشتغل بيها يمكن اوسخ افيو بالعالم رغم انها موديل الفين وهدعش ! وصارت جميلة بعد ان اصبحت اي الــ افيو توفر لي فائضاً مالياً استطيع ان اصل به الى (مؤخرة) الشهر التي تؤذيني وتؤذي اغلب موظفي القاطع العام ؟
سأقص عليكم يومياً ما سأشاهده وامر به من حوادث وانا اتجول في ازقة بغداد التعبانة جداً وشوارعها المخربة . وهي واحدة من الطقاطيق التي واجهتها في اول يوم لي كسائق لسيارة اجرة .
اني ما اعرف اكول لواحد من ياجرني ويكلي لفلان مكان هلكد سعر الكروة واكتفي بما يقترحه هو وان وجدت انه قليل اي السعر اقول له وداعتك قليلة بحبحهه شوية ان قبل بها ونعمت وان رفض قبلت بما اقترح يعني بالحالتين اني قابل ؟ واحد اجرني من ابو نؤاس كال لي لسوك الاولى بقطاع واحد كتله اصعد كال شكد الكروة كتله بكيفك كال اربع الاف زين كتله لا خمسه والله قليله كال لا اربعة و (اريحك) كتله شنو يعني تريحني كال اريحك واضاف لها غمزة في عينيه وحركة في فمه الذي يشبه فم الحمار ! والمشكلة بيوم الي واجهني هذا المعتوه جنت ما مشتغل ولا قمري فأضطريت اجاريه كلت بلكي اقنعه يعدل عن طلب راحتي ويكتفي بأعطائي مبلغ التوصيله اقترحت عليه ان يعطيني مبلغ الأربع الاف بدون اراحتي ولا اعرف ماذا يقصد بها الا انه ابى واستكبر وقال لن اصعد الا ان تقبل بالاثنين معاً ؟ حينها اضطررت ..
سعدي علو – بغداد
