حچاية التنگال – سعد العبيدي
وأخيرا وبعد جدل وركض سريع وهرولة، عبرَتْ حكومة الزيدي أول مطب، وبقوة دفع نفس قوة الدفع المجهولة الي حطتها على أول السكة، والملفت للنظر بعبورها، الالتزام الكامل بالشروط الامريكية، الخاصة بعدم وجود أحد من الفصائل بكابيناتها المكيفة بأجهزة تكييف جنرال إلكترك الأصلية، على الرغم من وجود فوگ الثمانين نائب تابعين لهاي الفصائل المستعدة للمقاومة حتى الموت. وهذا يعني الحديدة حارة والجماعة تعلموا اشلون يتعاملون ويه الحديدة الحارة حتى لا ينچوون.
والملفت اخوانا الاكراد حصلوا على استثناء من شروط الامريكان «المكرر لا يكرر» وعبروا اثنين من الوزراء من ذيچ الحكومة لهاي الحكومة، وهذا يعني ان الاكراد يعرفون اشلون يشتغلون سياسة، ويوازنون امورهم وعفيّه عليهم. والملفت الثالث قبل الأخير جماعة السيد المالكي ولا واحد بيهم عبر، وهمه لا فصائل ولا مقاومين.
وهذا معناتها إفَلْ نجم الرجل وراح زمنه، وجا غير زمن تبدلت بيه الملاعب واللاعبين… عاد كون يدرك الحقيقة، ويتفرغ الى العبادة وغسل الذنوب.
