مشروع الگاب .. صورة أم خيال ؟

337

مشروع الگاب .. صورة أم خيال ؟

ما معقول ما يجري في العراق.. الغشمه تارسين الشوارع و البيوت و الدوائر و الانترنت و كل مكان..

ما معقولة ماحد سامع بمشروع الگاب سابقاً !!!! معقولة؟

مشروع الگاب الي هو بالتركي مختصر ل( مشرع الاناضول الجنوب شرقي) تشكلت هيئة خاصة لادارته في تركيا من عام 1988 و كل الدنيا تعرف بيه و الحكومة العراقية مطلعة على ادق التفاصيل من هذاك الوقت الى الان .. حتى اني الي ما الي علاقة بالمياه والانهر حاضر قبل عشرين سنة ببيت الحكمة ببغداد ندوة عن الموضوع وكل التفاصيل الي متفاجئة بيها الناس سامعها اكثر من مرة بتلفزيون بغداد بذاك الوقت لان طلعت  برامج تتحدث عن المشروع وانذكرت مصطلحات مثل حرب المياه…و النفط مقابل الماء والى اخره من السوالف الي مكتشفيها الناس هسة وديلطمون. ثم انتو خابصين ارواحكم على سد واحد؟ المشروع بيه اثنين و عشرين سد يا ناس .. 8 على منابع دجلة و 14 سد على منابع الفرات.. و الشغل بيها ماشي من 1997 و كملت 6 سدود على دجلة و انترست ماي و سد اليسون الي الناس مخبوصة بيه هو السد السادس وبعد وراه سد سلفان يكمل عام 2019 و هم يترسوه… حضروا روحكم لللطم .. خوش مناسبة جاية عام 2019.. أما أعزائي جماعة مقاطعة تركيا .. تره الناتج الاجمالي التركي يعادل 8 اضعاف الناتج العراقي و ضعف الناتج السعودي .. يعني ما يتاثر بشكل مهم بالمقاطعة العراقية..  ثم شنو ذنب تركيا  تعاقبوها؟ احنا حكوماتنا طايحة حظ .. كانت الخطة الموضوعة لمعالجة تاثيرات مشروع الگاب من التسعينات هي بناء سدود لحصرالماء داخل العراق بدلا من انسيابه الى الخليج بدون سيطرة … بس صاحبنا خش بالكويت وسووا علينا حصار وما كدر يبني السدود ووره  2003 انشال الحصار بس اجوي الهتلية وباگوا الجمل بما حمل وبالهم مو يم القضية اصلا.. شغلهم الشاغل يتقاسمون الكعكة على گولة لبؤة المذهب..

تركيا دتبني وتعمر ومشروع الگاب مو بس سدود ولكن مع السدود يوجداستصلاح اراضي زراعية وتوفير فرص عمل وانشاء بنية تحتية متكاملة في المدن و الارياف ، وتشجير الغابات، وتطوير منظومتي التعليم و الصحة.. وتريدوهم يوكفون هذا المشروع؟ المن لخاطر عيون العراق المخربط؟ و الى متى يوكفوه و حكومتنا العراقية ماكو اي أمل وراها…

صفينا كهرباء ماكو و ماي هم راح ينكطع و الانتخابات طلعت مزورة و اشبعوا لطم لأن بس بهاي فالحين.. وخلوا باقي الناس في غير دول تتطور و تتقدم و احنا صرنا بأسفل السافلين.. نعم الشعب مسكين وما يستاهل بس روحوا شوفوا المن انتخب هذا الشعب؟ شوفوا الكتل الفائزة تصير عدكم فكرة عن دور الشعب في معاناة الشعب.. نفس الحرامية الي وصلوه للحضيض راحوا انتخبوهم…  اصلا حتى تضخيم موضوع السد حاليا سببه حتى تنسون الانتخابات والتزوير و تعوفون النتائج و التحالفات لان احسن طريقة للتخلص من الازمات هو خلق أزمات جديدة يلتهي بيها الشعب و ينسى الازمة القديمة.. منين اجيب الحظ هسه واجي اشربلي فد بطل ببسي مجرش واكل چبس مال بتيتة واني كاعد بشارع ابو نؤاس دا نتتظرالگطانة الي توهم صايديها من دجلة تنسگف .. منين؟

فلنراجع أنفسنا ياعراقيون ماذا سيحصل للعراق الْيَوْمَ وبعد غد…

صلاح الحسن

مشاركة