كلشي ماظل

كلشي ماظل..

لا حلم يترس العين

ولا نغم بشفاف ترقف.. ولا حنين

كلشي ماظل..

هوه راح العمر وتبعثر خساره

منين ما تلتفت محنه..

اوين ما تنوي انين

كلشي ماظل..

عمرك الفرحان إخنكَه

وحته صوتك هم إخنكَه

ودوك كَصعها الادين

كلشي ماظل..

الجان يمشي وياك عافك

وكَام يحفرلك طريقك

وكَام بحجي وياك بوكَك

والله يستر.. كسر جنحك..

بيش وتعلي انته فوكَك

وعمرك الجبته صبري..

والمصايب بس عله ولك تلوكَك

كلشي ماظل..

صغت من صبرك كَلايد..

حته لا تنسه الصبر

إيه.. يا كلشي اليمرك..

حزن دوم.. وفرح لحظه..

وعين ما بيها نظر

يمته وتفرزن ايامك..

جبت ايامك هدر

كلشي ما ظل..

حته روحك بعد ما بيها طعم

ونحل جسمك..

جانت ايامك نغم

وكلشي سويته لصحابك..

ضاع ياوسفه ندم

ياطرب بعد اليفيدك

وياأخو يكَلك عضيدك

ياغريب وتلكَه روحك بيه..

للماضي يعيدك

آنه ما كَلك بعد ابدي جديد

ولا تدور بالدفاتر..

بعد متكَلي شتعيد

جزه وكتك.. كَوطر وصاير بعيد

وخلها ترجيه بذانك

واصحه يمضيع زمانك

هذا وكتك موش ذاك

وتره حلمك ظل وراك

بعد متكَلبي شجاك

طيبتك ما تنفع بهذا الزمان

ولا تدور علحنان

كلمن وملتهي بروحه

يدور ما لاكًي امان

كلشي ماظل..

غير بس الذكريات

وانسه ياعيني الي فات

وراح اكَلك حيل اضحك..

صرت كومه من الزمان

كلشي ماظل

مهدي الحيدري – بغداد