طبق الأصل
إلى السيد وزير الداخلية عثمان الغانمي المحترم
عشت ايام زمن صدام اني وامي وابوي. اني الوحيد لأهلي عام 1996 الدولة اخذت ابوي تدريب مال جيش القدس واني اشتغل بالسوگ وما فكو عنه ياخة البعثية وجيش القدس الا الله شفتة بعيني وتسرح ابوي بعدها اجه السرة علية لحد 2003 وصلت مرحلة ادور خبز بالزبالة سقط نظام صدام وما حرر القدس ابوي ..من بعد 2003 صرت حر واهلي احرار بس اشتغل بالمزابل والغراض القديمة لحد 2008 صار عندي فلوس وفتحت بسطية بس شغلها موزين ضعيف… اشتغلت بالعمالة وظليت مستمر كل يوم شغلة ومعيش اهلي الحمد لله صارت 2014 تمرضت امي اني عندي ستوته وعندي بسطية وشغلي زين ظليت اصرف عليهم ثنينهم امي وابوي واداريهم بس خلصت فلوس ..لحد ما توفت امي 2018 بسبب ما عندي اخذها يم دكتور اخصائي …
اما بيتنه فهو 100 متر قبل وفاة امي عام 2016 اجو الحشد وجانت امي تكعد يم الباب العصر نزل شخص قائد مهم بالحشد سئلها كالها حجية ليش السگف مالتكم من جذوع وبواري عرف ما عندها والبيت مو النه يعني الكاع ملك الدولة بنفس اللحظة كال للسايق مالتة اشتريلهم هاي القطعة وسجلها بأسم الحجية وابنولهم البيت ..وصدك ما قصر خلال 10 ايام صار البيت حلالنا وخوش بيت ومن كمل جابو اوراق بأسم امي عام 2020 بدايتها استشهد هذا الرجال المهم وراها ب7 اشهر اجونه للبيت گالو البيت بنائة من هذا الشخص المستشهد لكن القطعة ما كملوا اجرائها وما تعود الكم .ابوي انطاهم المستمسكات والاوراق الاصلية والسند اخذوهن ورة إسبوع اخذو البيت غصبآ علينة زوروا الاوراق كلهن وما اشتكيت لان ماكو حل ولا هذا القائد الشهم موجود واناشده
رحت بنيت قطعة بالمتجاوزين غرفتين وحمام وانطلبت عليهن ومناطح وية الزمن الا اشتريت ستوته بيها حظ اسدد منها الدين وخلصتها واكو ناس تنازلوا عن الديون هاي من غير كل فترة بالسجن ..عندي جيراني امهم ميتة وابوهم كهربائي توفة بحادث وضلو الجهال يم خالتهم اني متكفل بيهم يعني اني مو مهم عادي ابات بالشارع بس ذولة اطفال وابوي رجال جبير وما يشوف واجيبلة دوة مال ضغط وسكر كل اسبوع ..اني اشتغل بالستوته كل شي يومية شغلة طلعت من الصبح على باب الله لا مخالف سير ولا مسوي شي وگفني ابو النجدة واخذ الستوته بهذه الحملة الاخيرة مالتكم واني انسجنت وطلعت من السجن بس الستوته ظلت واني رزقي عليها والله العظيم ..
اني احمل الك رسالة من الايتام وابوي الشايب الضرير
تطلع الستوته واطلع بيها على باب الله واعيش .
وهذا الشي الله ما ينسا الك ويوفقك وجزاك الله خير وسويها لخاطر جهالك واهلك
المواطن
سعد مظلوم عبد الواحد
{ عن مجموعة واتساب
