الأمن نعمة إلهية

الأمن نعمة إلهية
يا ناس الصبر طيب على يا مال مستعجلين راح (الكثير) وبقى (القليل) ما اقصد (المال والحلال) اقصد (الايام والسنين) غمض فتح اتشوف كل شي على المرام وشوف عندك يا سلام شوف الكهرباء فوق الحاجة اليومية وراح تجيلك منها حصة اضافية مثل الحصة التموينية في كل رمضان ما شفتم كل سنة تنطينة الحكومة ربع كيلو عدس ومعه تعليمات الاستعمال تلهم ملعقة شاي منه اول الفطور ولم تنسى وزارة التجارة الطحين الصفر كيلوين حتى تسوي كليجة العيد شوفوا الاوفياء مينسون شي وفوق ذلك ربما دجاجة مكرمة بمناسبة العيد حتى الفقراء والمتقاعدين
يفرحون من صدق بالعيد شفتم الدنيا ربيع والجو بديع …. يا ناس ماكو مشكلة اذا الكهرباء متذبذبه او قاصره عن تشغيل الاجهزة حالها حال الاسعار والمتذبذبين المتمسكين بالاخلاق والدين
اما الماء شكوبيه طبيعي ميه الميه بيه اشكال ارناك ترسبات ملحية وطينية ورمليه ويرقات وبيوض اسماك وقواقع وفلزات ولا فلزات ياناس يرادلكم خبره حتى تستفادوا منه خلوه يجي قطره قطره وشوف شلون يجيكم ماء مقطر ولوما هاي الماطورات مالتكم ما كان يشقط طين او طحين ولا تباوع على ذوله البطرانين اللي يشترون مي ابو البطاله والله هذا غير زمن احنه قبل خمسين
سنه كنا نشرب الماي من راس الحنفية .. اما مجاري مياه الامطار فامانة العاصمة متقصده ما تفتحها لانها واضعة خطة شيطانية ؟ اتريد اتحول بغداد الى فينيسيا الشرق (البندقيه) الطليانية ها ليش ما تصبرون غشمه دنكول يرادلها صبر صبر صبر اصبروا وصابروا … اما الامان فنعمة من الرحمن ، وما يطلع عصفور من هل الزاغور اللي يعبد الله خليه يعبد ايريد ابيته ايريد ابيت الله هو كلش في امان حتى اللي يلعب طوبه خليه يلعب واليغني خلي يغني حرية حرية بيع المشروبات الروحية واللاروحية ،هاي المسألة جدا طبيعية واللي يسكر خليه يسكر واللي ياكل مزه خليه ياكل مزه واللي يسمع ام كلثوم خليه ابراحته واللي يتنزه خليه يتفسح حريه (عرب واكراد حريه والبوسطه الشروكيه) (وفد حزام) ها خوتي ها
،،، والاستاذ والدكتور والمحامي والقاضي والعالم والاعلامي والصحفي والضابط والطيار حتى الجندي والشرطي محرسين (بسور سليمان) وكل لحظه ودقيقه تمر عليهم نسمه من نسمات الجنان … اما الشعراء والادباء والفنانين والمهاجرين من البلاد في ارض العباد فهؤلاء متبرعين من اجل الدعاية للحكومة الوطنية اللي تستاهل هذا واكثر واكثر وعفيه وعفيه وعفيه …. الله يرحم ايام زمان ؟
العربي والكردي والتركماني والاشوري والكلداني والصابئي والايزيدي وحتى اللي ماعنده قوم ينتسب الهم فهم في امان امان ياربي امان .. انت مسلم او مسيحي او من دين اخر سنشيعي ارثكاثوليبرتستاني خلط وش لايختلف الامر سواء بسواء وسيان سيان حقك في الدستور مصان مصان مصان وحياتك في حرز الرحمن … هنا في العراق نختلف عن كل البلدان انت عراقي
مرحب بك في كل الاوطان لا فيزا ولا موافقة حكومة تلك البلدان دينارك قوي فالت من العنان كم دينار تعيش في ارقى البلدان تتمتع وتتعالج في اي مكان وتجلب معاك كم جارية من ارقى البلدان … بس يرادله صبر اصبروا ياعراقيين راح يجيكم الرزق مثل ماي النهران عند الفيضان والكل فيها ربحان وما حد خسران بس الحرامي والديوس واللي ماعنده اذان
افهموها بس يا جدعان
خالد العاني – القاهرة
AZPPPL