يا عراق
يا عراق اشبيك ما تنشف الدموع
ونهر دمعك سال فيض دجلتك
لا تسوهي ارجوك ما تفيد الظنون
ويرفع التاريخ حتما كصتك
بيك ابد ما نعرف احنه الشتات
وبثغرها الشيعة باست سنتك
والمسيحي إبجفه جف التركمان
واليزيدي يشد نطاقه الصبتك
الكل مذاهبنا صبح دين العراق
وجعفر الطيار رافع رايتك
اوبيد ابو الحسنين يلمع ذو الفقار
امسنن اعلى اركاب كلمن طبتك
وندري ذو الفقار ما لازم سؤال
ويكلب الدنيه اذا ابهم غثتك
ونشعل شموع الرؤوس تضوي ليك
وحته نجم الله ايداوي ابعلتك
احنه حب إعراق عدنه بكد عراق
لان جبرائيل صله ابتربتك
وانته محراب او منارات او نجوم
وبيك حتى الدعوة تدعي الدعوتك
وهي يا حوته الكلت ضلع العراق
وانته يونس ما تهضمك حوتتك
انته وابل للعده تمطر رصاص
وتنكلب سجيل للطب كعبتك
انته بالكعبة الك موضع رفيع
جيفن ابراهيم جان ابحضرتك
وانته مهبط كل رسالات الآله
وبيك لسّه الكون خايف حوبتك
انته عصه موسى من ذاك الزمان
وكل سيوف الكون باست كصتك
وانته مدري وشنهي اوصاير شكول
يلي جف الكون ماسح دمعتك
وانته ياسين ومحمد والآمين
انته معراج الرسول ابناكتك
سلمان كريم عبد العتابي – بغداد
