رأس بصل أهم – إيلاف  محمد

446

 

 

 

رأس بصل أهم – إيلاف  محمد

عدة أيام تمر مشايف عائلتي..لان شغلي بمنطقة ريفية نائية بالسماوة..ارجع للبيت حتى شوية ارتاح ..

بمدخل بغداد ناحية الرشيد مفرزة تابعة للفرقة 17 جيش عراقي ..يكلي ما تدخل لبغداد ..

زين اخوية ليش ما يصير ؟

عدنا اوامر ماكو احد يدخل ..

اخوية اني طبيب و جنت بالدوام وهاي هويتي و صاعد سيارة شخصية يعني ليش ممنوع ؟

ماكو احد يدخل هسة اجة نداء ..

جاي اسولف وي الجندي ..و عبرت سيارة موهافي ..يابة ذولة ليش عبروا؟

ذولة ضباط ..

عمي علي عيني وراسي الضباط بس اني هم مشمول بالاستثناء مال الحظر مثلهم ..

لا ماكو احد يعبر .ارجع

يمعود وين ارجع ؟ دوام بالسماوة شلون ارجع ؟

بعد نقاش عقيم ماكو نتيجة ..

طلعنا بالسيارة اني و اخوية دكتور علي الخزرجي اخصائي الجراحة باتجاه ابو غريب و دخلنا من جهة الرضوانية و هناك أيضا الشرطة الاتحادية ماخلونا ندخل .

منتسب نائب ضابط يكول ماكو احد يدخل حتى لو طبيب ..

جاي اشرحله أنه اكو استثناء طبت سيارات حمل شايلة بصل ..شافهم من بعيد فتح العارضة و عبرهم .

كتله أهل البصل عبروا ! يكول اي ذولة عدهم استثناء لان مواد غذائية ..كتله ترة الطبيب مثل البصل هم بيه استثناء

ضحك الجميع في السيطرة و عم السرور ..

وبعد الضحك قرروا يسمحون النا بالعبور لخاطر البصل

ياريت صوتنا يوصل لقيادة عمليات بغداد و يتم توحيد القرار بخصوص حركة الكوادر الطبية و الصحية ..لان مالهم بديل في مكان العمل ..

اي شخص يكدر يشيل سلاح و يكطع شارع مع الاحترام لكل الجهود في القوات الأمنية و اني جدا ممتن منهم لكن الواقع يكول فرض القانون بالسلاح ممكن مجموعة شباب من المنطقة تكطع الشارع ( المقصود في فرض حظر التجوال و منع الحركة ) لكن ماكو احد يكدر يسد مكان الممرض و الطبيب في المستشفى بهاي الأزمة

ساعدونا حتى نساعدكم

مشاركة