طارق الخزاعي
اخوتي وخواتي: السلام عليكم..
يكولون بالاعلام والكل سمعت كلفت عملية تنظيف شوارع بغداد 23 مليار عراقي وبعهدة شركة تركية يا بوية شكبرة وشكثرة هذه المبلغ لو نحط دينار يم دينار جان طوق الكرة الارضية لجان الصدك اللي ما تجذبه عيونه زادت الحفر والنكر وطكت المجاري وانكسرت البواري مال الماي وجدام عيوني اكثر من عشرين شخص تعرضوا للرضوض والكسور واني منهم وتشهد علي حفرة طحت بيهه بليل اظلم.. لازالت مفتوحة بجانب نقطة تفتيش حي الصحة – الطريق الواصل لنهاية شارع 60 حطيت بيه اول امس تيار عتيج حتى الوادم لا تطيح بيهه وابشركم هنه اكثر من حفرة ولازالت تطيح بالابرياء من نهاية شارع ستين نقطة تفتيش الصحة الموصل لطريح ابودشير ناهيك عن اهمال متعمد لبعض مناطق بغداد من التنظيف وصار تهكم البعض يكول: بغداد اوسخ في هذا الزمان وليس اجمل للاسف واللي يشوف كورنيش ابو نؤاس من الجهة المقابلة للكورنيش يبكي على رسم درس بيوت محلات فلشة دكول مضروبة بصواريخ امريكية بلا رحمة وشحده اليمشي بالليل.. الجلاب التايهة تملخه تملخ اما اطراف بغداد فطركاعة سودة، اللي اكوله لو امانة بغداد تعاونت وية وزارة التربية وبالذات نسقت وية تربية بغداد بفرعيها الرصافة والكرخ وشغلت طلاب المدارس من المتوسطة والثانوية من الراغبين بالتطوع وفق مكافآت محددة طول العطلة الربيعية والصيفية وتحت اشراف مختصين يعلمون الطلاب شلون يزرعون ويسكون ويسمدون ويكاثرون الشتلات اعتقد المبلغ ما يكلف اكثر من مليار لو نص المليار.. كل مدرسة منطقة بمنطقتكم مع تجهيز الامانة الهم بالادوات الضرورية والصحية كالكمادات والكفوف ووجبات الطعام اليومية … صدكوني همه وحماس الطلبة وحرصهم ووظنيتهم تنظف بغداد احسن من الشركة التركية اللي موظفه مراهقين كسالى (كناسي شوارع) لا يملكون اي احساس بالمسؤولية.. تصورو احدهم علة الشارع من مستشفى اليرموك لساحة النسور يكسر القناني الزجاجية ويرميها على الرصيف او حتى في الشارع العام ومن اسأله ليش عمي هيج تسوي مو هاي بيهة اذية للناس.. يكلي حجي.. هاي ابطالة خمر بيهة رائحة نجسة ومن اكلة.. انت وظيفتك تخليص الشارع من اي نجاسة لحيوان او انسان يرد علي بكلمة: اني اشتغل بكيفي واللي يعجبني وهاي الريحة تخنكني كتلة شنو شركة التنظيف ما تنطيكم كمادات.. كالي من البسهة اختنك.. والطركاعة الزبل صار اكوام بشوارع الكرادة والشورجة وشارع السعدون والرشيد وحجيلكم على اسواق بغداد الجديدة لو علوة جميلة لو ابو دشير لو البياع وحي المعالف وخليني ساكت.
اخوتي وخواتي خلي ننسه الحقد والماضي ونحجي الصدك بالحاضر.. حملات العمل الشعبي اللي جانت اتصير بزمن النظام السابق سواء للتنظيف لو ردم المستنقعات لو تبليط الشوارع وتنظيفهه من الازبالا مو جانت بالمجان وتنجز بشكل يدعو للفخر والاعجاب بزنود الشباب العراقي وهمتهم مو همة حزب لو حكومة، ليش ما نتوجه لهاي الشريحة النظيفة الكلب والوطنية ليش الصين الشعبية تنجح تجاربهم وية الطلاب ومايخولهم احسون ابطاله لعدة هور ليش بفرنسا والمانيا يستفادون منهم بطقف العنب وباسبانيا الطماطة والفواكه وبالدول الاسكندنافية بتنظيف اشجار الطريق العام واشجار الغابات من الاوساخ والحشرات وفق مبالغ تشجيعية تعينهم على الدراسة وشراء الملابس وتزرع الثقة بنفوسهم ليش ما ننطي فرصة للشباب الجامعي وياهم.. جا الوطن مو بيتهم وينظفوه موش عيب انجيب غريب اينطف بغداد… جا اجدادنه كبل موش جان ينظفون بغداد بواسطة سقايات يشيلوهة على ظهورهم لو ظهور الحمير من نهر دجلة، يجوز واحد يكول بغداد اتوسعت وكبرت وانه اكله والبشر هم زاد وكثر بكل مدينة وواجبه العناية بمدينته وحرصه لى نظافته لجن لو انمد ادينه بعضهه البعض وخططنه للشغل النظيف مو لللغف والسحت الحرام وخلينة مصلحة وسمعة العراق فوك مصالحنة الشخصية جان كسبنة احترام العالم مثل الصين وشعبهه العظيم شنو اللي ينقصنه اذا النية طيبة ليش نتفرج على الحرامية يتلاعبون باموالنه وينفخون كروشهم ويطولون لسانهم سوينه وسوينه وكلشي ماكو ياريت نطلب من كل محلة بواسطة المجلس البلدي تتعاون وتشد حزامهة لتنظيف محلتهم واصحاب المحلات ينظفون ارصفتهم.. ياريت نخصص جوائز وننطي حوافز ونقيم المهرجانات ونحتفل محلة بامحلتهه تدرون لو ما تدرون اهل الهور من اشد العراقيين حرص على نظافة الاهوار، ما عدهم زبل يتراكم ويطعمون حيواناتهم وسمج الهور والطيور المهاجرة بالزايد من اكلهم وزادهم ولا يسمحون لواحد يرمي بالهور سكراب لو نفايات اطلاقا من حيث تعرقل مسيرة المشاحيف وتاثر على طبيعة الهور واسماكه.
اخوتي المسؤولين والمواطنين بعد جم شهر راح نستضيف باسمكم رؤساء مؤتمر القمة العربية ونريدهم يشوفون بغداد الف ليلة وليلة الي تتغنه وتتمنه تشوفهه كل شعوب العالم وترة.. نظافة بغداد من نظافة اهلهه بغداد دار السلام وعاصمة عراق المحبة والسلم الجميل.. نرة النظافة مسؤولية مواطن قبل ما تكون مسؤولية حاكم لو امين عاصمة.. شكثر حلو لو اصحاب المحلات يخلون سنادين ورد جدام محالهم والبيوت تصبغ جدرانهم بلون ابيض.. خلي نشد حزمنة ونبدي بنفسنه وبيوتنه ومحلاتنه والنظافة موش بس من الايمان.. اهي من رفعة الرأس بين البلدان. وخلي نبدي زنكه زنكه.. كصدي زقاق زقاق ودربونه دربونه.. شدكول امانة بغداد.. ترة الوكت من ذهب..
